أنا إنسان.....!!!

أنا ببساطة إنسان
عايش في دنيا مليانة بالألوان
فيها الابيض والاسود والرمادي كمان
انا مش حامل راية الشجعان
ولا انا من الفرسان
ولا ماسك في إيدي صولجان
لكن مش عايز اكون من العميان
انا ببساطة إنسان...
عايز أعبر عن حاجات جوايا
عايز أوصل إحساسي و منايا
أحلامي...واّهاتي وحتي بكايا
عايز أنقش علي الورق خيال
عن ماضي وحاضر ومستقبل جاي
عايز أحلم وانا صاحي
وأشوف في الحلم نجاحي
عايز بالكلمات أحكي حكايات
وأعبر عن واقع جاي وفات
عايز أواجه نفسي بنفسي
وأشوف في عنين الناس مرايات
تكشف ..تعكس نبض الناس
تعيشني الإحساس إن الدنيا لسه بخير
وإنه الأمل موجود مهما إن كان
عايز أحس بأخويا الغلبان التعبان
وأديله حب وأحسسه إنه في الإمكان
مع بعض نحس بالأمان
أنا ببساطة إنسان
عايز أعيش مش متهان
وحقي أخده بالمجان
مش عايز أهلل وأهتف
ولا أمشي ورا أي سلطان
ولا أغني..يحيا الملك يعيش في أمان
أنا ببساطة إنسان
نفسي أخرج بره سجني..وأودع القضبان
واطير...أطير عالي لفوق
وابني عش في أعالي الجبال
وأتنسم نسمة جديدة
نسمة نجاه....توهب الحياه
نسمة ترفع الجباه
أنا ببساطة إنسان
بحلم بالأمـــــــــان
لا انا عايز جاه ولا سلطان
لكن عايز أعيش زي ما انا
بـــــــس إنسان

كان صاحبي.....!!!!

كان صاحبي وعشره عمري
بحبه ومايغلاش عليه دمي
دايما مهون عليا الصعب
وضحكته كلها طيبة وحب
قلبه يساع من الحبايب ألف
صعب تلاقي زيه مهما تدور وتلف
وفي يوم جالي ودمعته في عينيه
كانت أول مرة أشوفه بيبكي
خفت وقلبي إتخض عليه
قلتلة مالك؟؟....جري إيه؟؟
قاللي-بعد ما تاهت الكلمه من جواه
ولفت ودارت جوة عينيه
قاللي "سابتني...جرحتني
بعد ما حسستني إننا واحد مش إتنين
وإننا علي هموم الدنيا هنكون قادرين
وإن الحب هو حياتنا
هيكون هو هوانا وزادنا
نزلت دموعه كمان وكمان وقال..
صعبانة عليا نفسي..
أنا كان مالي ومال الحب
منا عايش من غير إحساس
ومقضيها كدة وخلاص
حتي كلامي بحساب ويا الناس
قلتلوا...منا ياما حذرتك إنت وهي
وقلتلكوا الحب دة مسئولية
مش مجرد إحساس بيتعاش
ولا كلام حلو بيتقال
بس أديك إتعلمت
وأكيد هي كمان

خواطر عاطل محشش

إديني يا بني أحلي تعظيم سلام
لشباب مصر الهمام
الصاحي اللي عمره ما بيغفي ولا بينام
اللي باصص علي طول لقدام
بس تسألني باصص علي إيه؟!!
أأقولك باصص علي مزة جامدة معدية
بص ياد البت اللي هناك ديه!!!!!!
فكك وكبر ولا في الدماغ
دماغنا ضايعة ومقدمين بلاغ
طول الليل دش وتشات
وحكاوي الحب في التليفونات
أما بقي عن البنات.....
فهم مقضينها طول النهار قدام المرايات
يتزوقوا ويلزقوا في الميك اب والبويات
ولما تبقي مشغوله ومش فاضيه
يبقي أكيد بتلبس البنطلون
طبعا بنطلون أختها الصغيرة نادية!!!!
تسأل الواحد فينا مين السادات
يقولك دة أروش موديل في الكليبات
ولا تعرف إيه عن زويل؟؟
يقولك دة إسم صاحب الغرزة
اللي بسهر فيها بليل
انا كل حلمي وأملي
وهدفي اللي نفسي يكون مضمون
إن تمناية الحشيش تكفي السجارتين
والسمسون........
عايز أعلي الدماغ واطير طيران
واجري في الشارع زي المجنون
وازعق بكل صوتي واقول
كفاية أفيوووون.....
إصحوا وفوقوا من الغيبوبه
دة العمر مش مضمون
العالم كلة بيجري ويبدع
وإحنا يا حسرة!!!!
كل ما نمشي خطوة نرجع مليون
انا لامؤاخذة مسطول
لكن مش هسكت ولازم ااقول
اوعوا نبطل نحلم ونمد إيدينا
لأننا لو عشنا صح أكيد هنطول

علي ألحان عود...!!!

عندما يعزف العازف علي عود

وبريشته يضرب علي الوتر المشدود

أري" حبيبي"......بجماله المعهود

واقفا هناك في الأفق المدود

تتغني من حوله الطيور والورود

وأسمع صوته العذب قائلا.....

هيا تعال....تعال يا حبيبي المفقود

تعال ولتنهار بيننا السدود

ألا تذكر ما كان بيننا من عهود؟!!

ألا تذكر أيام عشقنا وحبنا؟!!

إشتقت إليك يا حبيبي...والي حبك

إشتقت الي أيام مضت...

كنت تلقي براسك علي صدري

وتتغني علي ألحان قلبي

أكاد لا أنسي نظرات عينيك

لقد ذاب قلبي كالشمع شوقا إليك

لقد أمضيت كل هذا الوقت أبحث عنك

والشوق واللهفة يقودانني إليك

فانا لا أري أمامي سوي صورة لك

صورة رسمتها دموع عيني

فوقعت هذه الكلمات علي قلبي

وقع الندي علي الزهر ساعة صبح

فراح قلبي يجري إليه بسرعة رمح

سائلا أضلعي أن تنفتح أمامه

وتفسح له الطريق...

الي حبيبيي....

مضت المسافة أميالا وأميالا

وانا أمني نفسي أحلاما وأحلاما

وكانت لحظة الملتقي.....

مددت ذراعي لأمسك يديك

واحسست انفاسك الحارة تهفو علي أناملي

وفي لهفة تعانقت أكفافنا

وكأنني أمسك قيثارة من ذهب

أعزف عليها أعذب الألحان وأترنم بإسمك

إطلق يا قلبي العنان لجواد مشاعرك

ولتتنسم ريح العشق والهوي...

ولتذرفي يا عيني دموع فرحك

ولتغسلي يا دموعي أحزان نفسي

لقد إنجلي زمان غربتك....

لأنه كتب لك اليوم ان تكوني ههنا

"مع حبيبك"

قالولي مالك بتكتب بكأبه

عمال تقول وحوش وغابة

وكمان ديـــــــــــــــــــــابة

ليه شايفها سودة وما تستاهلش

وحاسس إن بكرة ما يتعش

ليه باصص لنص الكباية الفاضي

وحاطط نفسك في صورة القاضي

اللي بيحكم عالدنيا بظلم

مالك شايف العيشة صعبة وغم

والدنيا مليانة هم ما يتلم

دي الدنيا حلوة والحياة وردية

بس عايزة اللي يفهمها صح

واللي يتلسع ما يقول أح

ويتخبط ما تسمع قولة أخ

عايزة اللي يعافر ويحفر في الصخر

ويقعد يحلم وسط الليل بالفجر

ويخلق للكلمات الجافة لحن

ويرسم طريق سهل وسط البحر

...................................

قلت مش عارف انا ليه بكتب كده

يمكن علشان الحزن في أيامنا كتير

او لأن السعادة بقت عاملة زي طير

والدنيا ليها صياد محترف خبير

بيعرف إزاي يخطفها ويوقعها

وفي شباكه وبحيله خنقها

او لأن غدر الدنيا لسه معلم في القلب

او لأن الحبييب ما بقاش يتحب

ولا جايز علشان غياب معني حقيقي للحب

ولا مصر اللي تعباني وكاسره نفسي

وبتخنق حلمي وهو لسة طفل جوه عنيا

أقول إيه ولا إيه بس

بس علي العموم جايز معاكو حق

وإن الدنيا لسة تستحق

وكدة ولا كدة اهي عيشة

ولاززززززززم تتعاش

حتي لو هنروح وراها بلاش

أيام فاتت...وأيام جاية

فينك يا أيام زمان الحلوة...؟!!

فين طلتك علينا تفرحي عيونا

وتشيلي كل دمع إتملت بيه جفونا

فين شلة زمان وقعدة الروقان

وسهر الليالي مع العيال الجدعان

لما كنا نطير مع بعض ما نحس بالزمان

فين قعدة حارتنا..وطلة البت جارتنا

لما كانت تطل من ورا شباكها

تزغلل عنين حتتـنـا و شبانها

أيام راحت ومش ممكن تعود

راحت بكل ما فيها من أحلام ووعود

راحت ولسان حالها..يا ربنا المعبود

إتولي الناس ديه...في أيام جايه

هتهرب فيها الضحكة من الوشوش

ويملي الهم الوش اللي كان بشوش

وتبكي العيال الصغيرة ليلة العيد

لأن أبوهم معـهـــــــــــــــــــوش

لما يتخلي شعب عن تاريخ الأجداد

لأنه ببساطة مش شايف غير صورة الجلاد

لما تبكي الأم بدل الدموع دم

علي ضناها اللي غرق في قلب اليَــم*

أيام ينقطع فيها الخير والمطـــــــــر

ويسيطر عالناس إحساس بالخطر

تعبنا وزهقنا والحزن ملي القلب

وما بقاش باقيلنا غير قوله يارب

لما يتغرب الواحد جوة بلده

وينكر الأب ضناه اللي من كبده

تبقي فعلا هي دي نهاية شعـب

*اليـــــم:البحـــر