مالك يا نفسي؟!!

.....نفسي أفهمك وأعرفك وأقدر أحكمك

بس مش عارف إيه يرضيكي

ولاايه اللي يخليكي سعيدة

كل يوم بحال وعلشان تهدي وترسي...لا دا محال

بتجري في كل حتة شوية

وتعباني معاكي رايحة جاية

وانا محتار....

وغرقت في بحر من الأفكار

وانا مش قدك ولا قد عمايلك

طب وبعدين...

ولحد أمتي تفَضلي علي دا الحال

لا شط يرسيكي ولا ريس يمسك بدفتك

ويروضك...

أكيد هتقعي من التعب في آخر المشوار

وتنكشف كل الأسرار

لكن بعد ايه....

هيكون فات الأوان وشبابك وقوتك

هيكونوا في خبر كان...

اصحي لنفسك والحقي علشان الوقت

لو عدي يبقي مفيش أمل

وهيكون همك اكتمل ولا تنفع الحيل

أو الأعذار...

ألحقي دا انتي جربتي زمان الأمان

وزوال الأحزان...

ما وحشتكيش الضحكة اللي من القلب؟!

ما نفسكيش في نومة من غير قلق

وراس من غير صراعات

وبال مرتاح....

ارجعي دة لسة الباب مفتوح ليكي

ارجعي قبل ما يتقفل

وساعتها الدمع هيملي القلب قبل العين

ومش هتفلتي من الحزن والأنين

يلا قومي...

دا ربك بينادي عليكي وبيقولك تعالي

تعالي وانا اديكي الحرية

واخليكي تهبي وتشبي فوق كل قسية

واطلعك فوق الجبال وادوقك طعم الحنية

يلا..انفضي عنك كل تعب

واطلعي من الخيَّة

تعالي انا هريحك وافرحك

ومن كل حاجة تشبعك هديكي

..هضلل عليكي بإيدي ولا شيء

ياخدك مني

منا أصلي عارف انتي عايزة اية

وفاهم اية يريحك

وعارف اية يرضيكي